അലഭാവം

ഓർമിച്ചെടുക്കാനാകാത്ത ശൈശവം,

മൗനിയായ കൗമാരം..

പ്രണയം തളർത്ത യൗവ്വനം

പ്രതീക്ഷിക്കും മുമ്പെ

വിരുന്നെത്തിയ വാർദ്ധക്യം,

എതു മഴയത്താണ് ഞാൻ

എന്നെ മറന്നുവെച്ചത് ?

അക്ഷരങ്ങളിലെ സത്ത നഷ്ടപ്പെടുമ്പോൾ

ആന്തരാത്മാവിലെ തീയ്യ് ആടിയുലയുമ്പോൾ,

തോലുരിഞ്ഞ് രക്തമിറ്റുന്ന

എന്റെ  ശരീരം അഴയിടാൻ -

പള്ളി സിമിത്തേരിക്കു മുന്നിലെ

ഒറ്റക്കൽക്കുരിശിന് ത്രാണിയുണ്ടോ?

മൃതരുടെ മുമ്പിൽ വെച്ച്

എനിക്ക് നിന്നെ വെല്ലുവിളിക്കണം.

മൂന്നാം നാൾ ഉയർത്തെണീറ്റ നീ

നാല്പതാം നാൾ ഒളിച്ചോടിയതെന്തേ?